Das bi ig...

Mi Name isch Marina u ig bi glehrti Floristin u schaffe imene wunderschöne Bluemelade z'Thun, woni mini Kreativität u Lideschaft cha usläbe. Vor paar Jahr ha ig aber no e angeri Lideschaft entdeckt u zwar z'Handlettering.
Ig bi scho geng gärn kreativ gsi u ha nöis usprobiert. Di verschidene Schrifte u Stifte heis mir sofort ahta u wasme dermit aues Schöns cha zoubere. Mi hetmä aube fasch gar nid chönne brämse weni wider mau e nöie Stift ha wöue gah choufe. Meistens isches drum de oh nid nume bi eim blibe.. :)
Bis ize ha ig geng eifach chli für mi häre kritzlet oder mini Familie u Fründe öppe eis mitemne säuber gmachte Chärtli oder Biud e Fröid gmacht.
D'Fröid u di positive Reaktione si geng so gross gsi, das mi das bi mim Mache söfu bestercht het dasi Lust uf meh ha becho... u so isch Maribella Handlettering entstange.
Für mi isch eigentlech oh relativ schnäu klar gsi i weli Richtig mis Logo söu ga u dasi das säuber wott gstaute. D'Libelle bedütet für mi Eleganz, Freiheit, Liechitgkeit u Schönheit, was ig sehr mitem Handlettering tue i Verbindig setze. Wiu genau die Sache sis wo für mi das Handwärch tüe widerspiegle. Dr Name isch e Zämesetzig us mim Name und am Wort Bella.. oh das seit gloub scho gnue us. 

Gärn wett ig mis Hobby iz oh mit öich aune teile. Vo Chärtli zu jenste Ahläss, über Baby Biuder und und und, fingsch du bi mir verschidensti Sache rund ums Handlettering.

I gloube wemä mini Familie u Fründe würd frage wie si mi würde beschribe, wär das ganz eifach... Ufgsteut, fröhlech, kreativ u mängisch vilech oh chli toupatschig u verrückt. Aber i finge das ghört ja oh chli derzue :) z'Läbe isch schliesslech da zums lustig ha u jedi Sekunde dervo z'gniesse. Das isch e Grund meh wiso ig mi für das aues hie entschide ha. Ig bi dr Meinig dasme eifach viu z'säute die chline u schöne Sache im Läbe gniesst u nid das macht, wome eigentlech gärn hätt. Tröim si schliesslech nid nume zum tröime da... 

Schön begleitisch du mi uf däm Wäg.