Mi Name isch Marina, ig bi glehrti Floristin u schaffe imene wunderschöne Bluemelade z'Thun, woni mini Kreativität u Lideschaft jede Tag cha usläbe.
Vor es paar Jahr hani aber no e angeri Lideschaft für mi entdeckt.
Vo Stifte, Schrifte & ganz viu Kreativität
Ig bi eigentlich scho geng gärn kreativ gsi, ha nöii Sache usprobiert u mi für aues begeisteret, woni irgendwie cha säuber gstaute.
Wo ig z'Handlettering ha entdeckt, heis mir die verschiedene Schrifte, Stifte u die unändleche Müglechkeite sofort ahta. Faszinierend, was mä mit es bitzeli Papier, Farb umene richtige Stift aues cha zoubere.
U plötzlech isch Maribella entstange …
Am Ahfang hani houptsächlech für mi häre kritzlet u usprobiert. Ab u zue hani mire Familie oder Fründe mitemne säubergmachte Chärtli oder Biud e Fröid gmacht. U genau die Fröid u die liebe Reaktione druf hei mi immer wider motiviert, witerzmache, Nöis uszprobiere u mi kreativ usztobe.
Irgendwenn hani gmerkt: Ig ha Lust uf meh.
U so isch Schritt für Schritt Maribella Handlettering entstange.
Hüt darf ig mini Fröid am Gstaute mit öich teile. Vo handgmachte Chärtli für die verschiedenste Ahläss über personalisierti Baby Biuder bis zu individuelle Ufträg entstöh bi mir ganz ungerschidlechi Sache – aber geng mit viu Liebi zum Detail.
U wär steckt hinger Maribella?
Wemä mini Familie u Fründe würd frage, wie si mi beschribe, wär d'Antwort wahrschinlech zimlech schnäu klar:
Ufgsteut, fröhlech, kreativ, detailverliebt – u mängisch vilech oh chli toupatschig u verrückt.
Aber genau das ghört für mi derzue.
Z'Läbe isch schliesslech da, zum Fröid ha, z'lache, Nöis uszprobiere u die chline schöne Momänte zwüschedüre nid z'vergässe.
U genau drum isch Maribella für mi oh meh aus nume es Hobby. Es isch es Stück vo mir u vo däm, woni gärn mache. E Ort, woni kreativ cha si, Sache cha usprobiere u hoffentlech mit mine Wärch immer wider öpperem e chli Fröid cha mache.
I finge, mä sött viu meh das mache, wo üs würklech Fröid macht u üs oh mau troue, usere chline Idee öppis Grössers lah z'entstah.
Tröim si schliesslech nid nume zum Tröime da.