Aktuells rund um Maribella
Hie erfahrsch du, was bi Maribella grad so louft – vo bevorstehende Events u Pop-up Stores bis zu de Orte, wo du mini Charte u Gschänkahänger oh vor Ort chasch entdecke.
Vilech gseh mir üs ja scho gli irgendwo persönlich.
Nöii hesch du uf mire Website d'Müglichkeit, direkt bi de Baby Biuder u personalisierte Charte e Kommentär z'hingerlah u dini Erfahrig mit Maribella z'teile.
Für mi steckt i jedem Uftrag ganz viu Härz, Zyt u Liebi zum Detail. Umso schöner isches für mi z'ghöre, wie mis Wärch am Schluss bi öich ahchunnt.
U dini Rückmäudig macht nid nume mir e riisegi Fröid – si hiuft oh angerne, wo Maribella grad ersch entdecke.
Auso: We du scho öppis Persönlechs vo mir hesch, würdi mi mega fröie, we du dir churz Zyt nimmsch u es paar Wort da lahsch.
D'Kommentarfäuder fingsch ganz unger bi de Baby Biuder & personalisierte Charte.
Merci viu mau für dis Vertroue u das mini Wärch immer wider es Plätzli bi öich dörfe finge.
Maribella im Pop-up Store
Vom 7. November 2026 bis Ändi Februar 2027 fingsch e Uswau vo mine Charte u Gschänkahänger im Pop-up Store z'Münsige.
Du möchtisch mini handgmachte Sache mau live ahluege, chli dürestöbere u dis Lieblingsstück direkt mitnäh? De lohnt sech e Bsuech grad doppelt: Näbst Maribella si oh no angeri kreativi Chöpf mit ihrne handgmachte Produkt derby.
So erwartet di e bunti Uswau a verschidene Handmade Unikat – perfekt zum chli stöbere, entdecke u vilech bereits z'einte oder angere bsungrige Gschänk z'finge.
I fröie mi riisig, das e Teil vo Maribella für die Zyt z'Münsige es Plätzli fingt!
Maribella fingsch ou z'Thun
Du bisch us dr Region Thun u möchtisch mini Charte lieber vor Ort ahluege?
E Uswau vo mine Charte u Gschänkahänger fingsch du oh im Bluemelade Blütenreich z'Thun, woni aus Floristin schaffe.
So chasch ganz i Rueh dürestöbere, dini Lieblingscharte direkt mitnäh u dr Bsuech grad no mitere Portion Bluemefröid verbinge.
D'Uswau cha immer mau wieder variiere – es lohnt sech auso, zwüschedüre verby z'luege.
Blib ufem Loufende u bsteu dir dis Unikat
Du möchtisch nüt Nöis rund um Maribella verpasse?
Uf Instagram nimi di immer wider chli mit hinger d'Kulisse, zeige nöii Wärch u haute di über Aktuells ufem Loufende.
U we du öppis ganz Persönlechs suechsch – sigs e Charte fürne bsungrige Ahlass, es Baby Biud oder e ganz eigeti Idee – darfsch du di natürlech jederzyt bi mir mäude.
I fröie mi uf dini Idee!
maribella_handlettering