Mis Ahgebot
Für die chline & grosse Momänte im Läbe
Vo handgmachte Charte über persönlechi Baby Biuder bis zu individuelle Einzustück – hie fingsch aues, was bi Maribella mit viu Härz, Kreativität u Liebi zum Detail entsteit.
Gschänksahänger
Mängisch sis genau die chline Detail, wo es Gschänk no chli persönlecher mache.
Mini handgmachte Gschänkahänger gits i verschiedene Farbe u Variante u passe perfekt zumene schön verpackte Gschänk oder eifach aus chlini Geste fürne Lieblingsmönsch.
Jedes Ahängerli wird vo Hang usgschnitte, mitere Öse umene Schnüerli ergänzt u när individuell vo Hang beschriftet.
Grössi: 9,5x5,5 cm
Postcharte
Zumene schöne Gschänk ghört mängisch eifach no z'passende Chärtli derzue.
Ob Geburtstag, Geburt, es liebs Merci, es paar tröstendi Wort oder eifach so – bi mine Postcharte fingsch du für ganz ungerschidlechi Momänte im Läbe z'passende Sujet.
D'Designs wärde vo mir vo Hang zeichnet u gstautet u när professionell druckt.
Grössi: A6
Baby Biuder
Es ganz persönlechs Unikat fürnes ganz nöis Läbe.
Mini Baby Biuder si e wunderschöni Erinnerig a d'Geburt u es persönlechs Gschänk, wo hoffentlech no ganz lang es Plätzli im Chinderzimmer darf ha.
Jedes Sujet wird vo Hang mit Aquarellfarbe gmaut u mit de persönleche Ahgabe vom Bebe ergänzt. So entsteit jedes Mau es ganz persönlechs Einzustück.
Grössi: A3 inkl. Biuderrahme
Personalisierti Charte
Ob Geburtstag, Hochzyt, Geburt, Toufi oder e ganz angere bsungrige Ahlass – dini Charte wird individuell gstautet, gmaut, beschriftet u mit viu Liebi zum Detail zämegsetzt.
Name, Datum, Spruch oder persönlechi Botschaft chöi je nach Wunsch integriert wärde. So wird us jedem Chärtli es chliises Unikat.
Grössi: 15x15cm oder 15x10cm (inkl. Couvert, wo oh beschriftet isch)
Personalisierti Schiuder
Für Hochzyt, Geburtstäg, Fescht oder eifach aus persönlechi Dekoration für Daheime oder im Gschäft – es individuell gstautets Schiud cha ganz ungerschidlech ihgsetzt wärde u git jedem Ort e persönlechi Note.
Je nach Ungergrund u Wunsch wird z'Schiud vorbereitet, bemaut u vo Hang oder mitem Plotter beschriftet.
Grössi: individuell
Speziau Ufträg nach Wunsch
Du hesch e Idee im Chopf, aber fingsch hie nid ganz das, wo du suechsch?
De mäud di unbedingt bi mir.
Ig liebes, persönlechi Ideene ufznä u öppis ganz Individuells drus la z'entstah. Verzeu mir, was du dir vorsteusch, u mir luege zäme, was sech laht la umsetze.
Ob es bsungrigs Gschänk, öppis Persönlechs für Daheim oder e ganz angeri Idee – ig bi gspannt, was mir zäme dörfe kreiere.
